Idiazabal Lurraldeak eta Sagardoaren Lurraldeak, “Gazta eta sagardoaren lurraldeetako pasaporte gastronomikoa” aurkeztu dugu gaur goizean Gipuzkoako Foru Aldundian. Esperientzia berri honek, hiru eskualde (Donostialdea, Goierri eta Urola Garaia), lau museo gastronomiko (Sagardoetxea, D’Elikatuz, Igartubeiti eta Gaztaren Interpretazio Zentrua), gaztandegiak eta 15 sagardotegi batzen ditu, sektore publikoa eta pribatua uztartuz.
Andoni Gartzia (Astigarrako Alkatea eta Sagardun Partzuergoako Lehendakaria), Igor Eguren (Ordiziako Alkatea eta Goitur-eko Lehendakaria), Roke Akizu (Gipuzkoako Foru Aldundiko Turismo Zuzendaria) eta Koldo Lizarraldek (Gipuzkoako Foru Aldundiko Landa Garapenerako Zuzendaria) esperientzia berri honen inguruko azalpenak eman dituzte bertaratu diren komunikabide, museoetako ordezkari, sagardogile, turismo alorreko profesional, etb-en aurrean.
Idiazabal Lurraldea eta Sagardoaren Lurraldea batzen dituen esperientzia honek, gure herrian izaera gastronomiko handia duten bi herri eta bi eskualde batzen ditu, eta horietan ekoizten diren sagardoa eta gazta produktu gastronomikoetatik abiatuta, hauek atzetik duten gure sagardogile eta baserritarren ondare naturala eta kulturala ezagutzeko eskaintza zabala eskaintzen du bisitari nahiz bertakoentzat.
Gipuzkoako bi lurralde hauen arteko lau urtetako elkarlanaren ostean, beste urrats bat gehiago eman eta gure gastronomia, kultura eta ondarea ezagutara emateko eskaintza turistiko berriak sortzen jarraitzen dugu. Lan horren emaitza, Gazta eta Sagardoaren Lurraldeetako Pasaporte Gastronomikoa eta dastaketa eta erakustaldi gastronomiko bereziak dira.
Gazta eta Sagardoaren Lurraldeetako Pasaporte gastronomikoa
Pasaporte hau Sagardoaren Lurraldeako, Idiazabal Lurraldeko eta Gipuzkoako hainbat turismo bulego, alojamendu eta baliabide turistikotan jarriko da bisitarien eskura eta honako eskaintza biltzen du:
– Museo gastronomikoetan %20ko beherapena: Sagardoetxea Sagardoetxearen Museoa (Astigarraga), D´Elikatuz (Ordizia), Gaztaren Interpretazio Zentroa (Idiazabal) eta Igartubeiti Baserria (Ezkio Itxaso) bisitatuaz gero, bisitariari %20ko beherapena egin eta pasaportea seilatuko zaio museo bakoitzean.
– Zenbait planen proposamena: zenbait pakete proposatzen dira prezio itxi baten truke:
1) 2 Museo + sagardotegia: 34€
2) Museoa + gaztandegira bisita + sagardotegia: 34€
3) Museoa + sagardotegia: 32€
4) Museoa + gaztandegira bisita: 5€
5) Asteburuko paketea (2 museo + sagardotegia + alojamendua): 67€tik aurrera.
– Lau museoak bisitatu eta pasaportea seilatu edo asteburuko paketeaz gozatuz gero, Sagardoa eta Idiazabal Gaztaren Lurraldeko Nekazalturismo batean asteburua eta gazta eta sagardo lote baten zozketan parte hartzeko aukera izango da. Zozketa hau hiru hilabetero egingo da.
– Taldeentzat eskaintza: 20 lagunez gaindiko taldeentzat eskaintza erakargarria izango da: sagardoa eta gaztari lotutako ibilbide tematikoak izango dira Sagardoa eta Idiazabal Gaztaren Lurraldean zehar; interpretazio zentro, gaztandegi eta sagardotegietako bisitak barneratuko dituena.
Pasaporte hau turistak eta bisitariak erakartzeko produktu turistiko berri bat izateaz gainera, Gipuzkoako eta Euskadiko biztanlegoari gazta eta sagardoaren kultura erakusteko programa bat da.
Gazta eta Sagardoaren Lurraldeetan dastaketa eta erakustaldi gastronomiko bereziak
Bisitariari esperientzia eta bizipen berriak eskaintzeaz gain, sagardoa eta gaztaren uztartze honek bi lurralde hauen arteko harremana sendotu eta lurralde bakoitzaren nortasuna herritarren artean ezagutara eman nahi ditu. Horretarako, dastaketa eta erakustaldi gastronomiko bereziak ospatuko dira:
– Ordiziako Euskal Jaietan (irailaren haseran) D´elikatuz Zentroak antolatzen duen gazta dastaketa edo maridajea sagardoarekin egingo da.
– Irailaren 21ean Idiazabalen ospatuko den Gaztaren Mamia ekitaldian, sagardo dastaketa izango da.
– Astigarragan irailaren 29an ospatzen den Sagar Uzta egunean, herriko plazan egingo den sagardo dastaketarekin batera Idiazabal Gazta desberdinen dastaketa egingo da eta bi lurraldeen arteko herri kirol probak izango dira.
– Urrian Igartubeitin ospatzen den Sagardoaren Astean, gazta dastaketa egingo da.
– Aste Santuan, Astigarragako Sagardoetxea Sagardoaren Museoak sagardoa eta Euskal Herriko gazta ezberdinen dastaketa eskaintzen die bisitariei eta datorren urteko Aste Santuan, dastaketa hau egunero eskaintzeaz gaitera, egun oso bat Idiazabal Gaztari bakarrik eskainiko zaio, “Idiazabal Eguna” izango dena. Bertan dastaketak, azalpenak eta erakustaldiak izango dira.
– Urtean zehar Fam trip-ak antolatuko dira bi lurraldeetako ordezkarien artean bestearen baliabideak ezagutzeko.
Gazta eta Sagardoaren Lurraldeetako Pasaporte Gastronomikoa ikusi