“Ados al zaude Sagardoetxearen etorkizunerako proposamenarekin?”. Hau izango da Astigarragako herritarrek otsailaren 6ean egingo den herri-galdeketan erantzun beharko duten galdera.
Sagardoetxearen etorkizunerako proposamena, hausnarketa-talde batek Sagardoetxearen ibilbidea eta gaur egungo egoera kontuan hartuta landutako proposamen arrazoitua da.
Hausnarketa Taldea Astigarragako hainbat eragile eta norbanakok osatutako taldea izan da eta 2021eko udaberrian egindako hausnarketa-prozesuan landu zuten Sagardoetxearen etorkizunerako proposamena.
Gaur egun ezagutzen dugun Sagardoetxeak 15 urte bete berri ditu, hamaika dira bertatik egiten diren lan eta jarduerak. Hasi sagarraren kulturaren ezagutza bildu eta zabaltzeko jardueretatik (dokumentazio zentroa, bisita-gidatuak, jardunaldiak…), herri mailan ospatzen diren eta herriko eragileekin batera antolatzen diren ekimenak arte.
Sagardoetxea baina txiki geratu da. Gaur egun egiten diren jarduera eta ekimenak aurrera eramateko eta sagar-kulturaren inguruan bildutako dokumentu eta pieza etnografikoak bildu eta herritarren eskura jartzeko leku nahikorik ez dago. Halaber, sagar- eta sagardo-kulturaren alorrean gaur egungo lan-ildoak sendotu eta berriak zabaldu nahi dira, beti ere lankidetza oinarri.
Testuinguru honetan, hausnarketa-taldeak Sagardoetxearen etorkizunerako hurrengo proposamena luzatzen du:
1. Sagardoetxearen proiektu berriak Astigarraga sagardogintzaren eta sagarraren kulturaren erdigunean jarriko du eta herri- eta eskualde-izaera eta -proiekzioa gaindituko ditu.
2. Bertako ekonomia, merkataritza eta turismoa sustatuko ditu, eta askotariko bisitariak erakarriko ditu (bertako nahiz atzerriko bisitariak, ikastetxeak…).
3. Sagardoetxearen proiektua landuko da sagardogile eta sagarraren sektorearekin, beste administrazio publikoekin, herritarrekin eta eragileekin.
4. Egoitza berria Kontxa Etxeberria lorategiaren eta sagastiaren artean kokatuko da. Egoitza hori lurpean egingo da hein handi batean eta, beraz, lorategiak herritarrentzako berdegune eta aisialdirako eremu izaten jarraituko du. Sagardoetxe berriak ez du Kultur Etxe Zaharraren eraikina erabiliko.
5. Sagardoetxe berriaren finantzaketan Astigarragako Udalak eta beste administrazioek parte hartuko dute. Sagardoetxe berriaren proiektuak ez ditu inola ere baldintzatuko eta ezerezean utziko bestelako udalinbertsio eta -zerbitzuak
6. Sagardoetxe berriaren proiektua estrategikoa da Astigarragarentzat. Sagardoetxeak, sagardoaren kultura sustatuz eta hedatuz, gure ondarea balioan jarriko du.
Sagardoetxearen etorkizunerako proposamen honen aurrean Astigarragako herritarrek adostasuna edo desadostasuna adierazi ahalko dute eta horretarako, baiezko eta ezezko boto-paperak izango dira eskuragarri. Azalpen foiletoa ikusi.
Nork har dezake parte?
Herri-galdeketan Astigarragan erroldatutako eta 16 urtetik gorako herritar orok har dezake parte.
Noiz? Eta non?
Herri-galdeketa otsailaren 6an, igandea, izango da. Goizeko 9:00etatik arratsaldeko 20:00etara eman ahalko da bozka Erribera Kulturgunean kokatuta egongo diren galdeketa-mahaietan.
Aurretiaz bozkatzeko aukera ere izango da, Udaletxeko Idazkaritzan, urtarrilaren 19tik eta 28ra bitartean, hurrengo ordutegian: egunero 9:00etatik 13:30etara eta astearte eta ostegunetan arratsaldez ere bai, 16:00etatik 18:00etara.
Informazioa ematea
Hurrengo egunetan Astigarragako Udalak, Elhuyar eta TaPunturekin elkarlanean, herri-galdeketari buruzko informazioa zabalduko du. Etxez etxe informazio-orriak banatzeaz gain, herrian zehar hainbat informazio-panel eta euskarri jarriko dira.
Era berean, herri-galdeketaren zehaztasunak azaldu eta Sagardoetxearen etorkizunerako proposamena partekatzeko informazio-saioak egingo dira hurrengo bi asteotan.
Azkenik, Sagardoetxearen behar eta nahiak bertatik bertara ezagutzeko bisita-gidatuak egingo dira urtarrilaren 27an, osteguna, 18:00etan eta urtarrilaren 29an, larunbata, 12:00etan. Bisita-gidatuetan Sagarduneko kideek Sagardoetxearen 15 urteetako bilakaera zein izan den azalduko dute, gaur egunean egiten diren jardueren berri ematearekin batera. Bisita-gidatuak doakoak dira.
Informazio gehiago: https://www.astigarraga.eus/eu/sagardoetxea-galdeketa-otsailak-6
Iturria: Astigarragako Udala