Azken urteotako ziurgabetasun eta murrizketen ostean, txotx-eko ohitura indartsu itzuli da Euskal Herriko sagardotegietara. Baina sagardotegietara itzultzeaz gain, aurten putzua ere zeharkatu du eta Oregonera iritsi da Son Of Man upeltegiaren eskutik, Estatu Batuetako sagarrekin sagardoa egiten duen upeltegia. Columbia ibaiaren ertzean dagoen sagardotegi honek denboraldiari hasiera eman eta bere sagardo berria ezagutzera emateko jaia ospatu zuen martxoaren 5ean. Ehun bat lagun bertaratu ziren eta euskal ordezkaritza bat ere bertan izan zen.
Son of Man-ek urteak daramatza sagardoa Oregongo sagarrekin egiten. Jasper Smith enpresako kudeatzaileak euskal kulturari egindako omenaldia da, hemengo kultura eta sagardoari dien maitasunaren ekimenez sortu zena. Gaur egun, 80.000 litro inguru ekoizten ditu, eta Basque style cider, hau da, euskal estiloko sagardoa gisa merkaturatzen du bere sagardoa.
Bere lana Euskal Herrian ere aitortua izan da, 2021eko Sagardo Forum Nazioarteko Sagardo Lehiaketan zilarrezko domina jaso baitzuen. Oso lorpen garrantzitsua izan da Son of Manentzat, Euskal Herriko sagardo onenekin lehiatu baitzen eta oso puntuazio ona lortu baitzuen. “Guretzat arrakasta handia da, esan nahi baitu gauzak ondo egiten ari garela eta gure sagardoa euskal ahosabaien mailan dagoela. Horrek ez du preziorik niretzat, eta norabide berean lan egiten jarraitzera bultzatzen nau”.
Euskal inspirazioko sagardoa egiteaz gain, aurten Son of Man sagardotegiak hainbat ekitaldi antolatu ditu upeltegian, txotx-aren errituaren baitan. Martxoaren 5ean inaugurazio ekitaldia egin zen, eta 100 pertsona baino gehiagok parte hartu zuten. Kupeletatik zuzenean sagardoaz gozatu ahal izan zuten, txuleta falta izan ez zen menu batekin batera.
Ekitaldira euskal jatorriko amerikar talde handi bat etorri zen, batez ere Boisetik, Estatu Batuetako euskal diasporako hiriburutik. Gainera, sagardotegiak euskal ordezkaritza bat bertan izatea nahi izan zuen, Euskal Herriko sagardoaren sektorearekin zerikusia duten profesionalek osatua.
Donostiatik Haritz Rodriguez joan zen. Urteak daramatza euskal sagardoaren kultura munduan ezagutarazten, Ciderzale izenarekin. Gainera, Zapiain sagardotegirako marketin aholkularia ere bada. Guillermo Castañosek, Son of Man-i sagardoa egiten lagundu dion enologoak, osatu zuen ordezkaritza, Oiharte bezalako bertako sagardotegietarako ere lan egiten duena.
Inaugurazioaren une batean, Rodriguezek hitz batzuk esan zizkien bertaratuei: “Oso pozik gaude Oregonen egoteaz, sagardo uzta berria Euskal Herrian egiten dugun bezala ospatzeko”. Ohore bat da Son of Man erakundeak gure sagardoa hain modu zintzoan omentzea, gure ohiturekiko eta gure produktuarekiko ezagutza eta maitasun sakonetik. Orain kupelak zuzenean dastatuz gozatzea besterik ez dago. Txotx!”