- Zazpi egunez, lurraldeko hainbat tabernek eta jatetxek bertako eta nazioarteko sagardoa uztartu eta sustatzeko proposamen gastronomikoak eskainiko dituzte.
- Sagardoaren Lurraldeak antolatutako ekimena Sagardo Forum nazioarteko kongresua egiten ez den urteetan egiten da, sagardoaren kultura sustatzen jarraitzeko.
- 2026ko edizioa hedapen geografikoagatik nabarmentzen da; izan ere, lehen aldiz, Bidasoa eskualdeko bi establezimenduk bat egin dute ekimenarekin.
Sagardoaren kulturak Gipuzkoako taberna eta jantokietako barrak eta mahaiak hartuko ditu berriro. 2026ko azaroaren 16tik 22ra egingo da ‘Cider Week Astea’ ekimenaren hirugarren edizioa. Sagardoaren Lurraldeak sustatutako ekimenak jauzi kualitatibo eta kuantitatiboa emango du aurten, Donostia, Hondarribia, Tolosa, Hernani eta Astigarragako hamabost establezimenduren parte-hartzeari esker.
Zazpi egun horietan, gipuzkoarrek askotariko eskaintza gastronomikoaz gozatzeko aukera izango dute: dastaketa gidatuak, sagardoekin uztartutako menuak, Michelin izarra duten jatetxeen proposamenak, gure tabernetako ohiko pintxoekin egindako uztartzeak, aperitibo bereziak eta nazioarteko sagardoen salmenta.
Ekimenak bertako sagardoak bilduko ditu, horietako batzuk Euskal Sagardoa Jatorri Deiturakoak, baita nazioarteko sagardoen aukera zabala ere, Bretainiatik, Italiatik, Alemaniatik, Norvegiatik, Suediatik eta beste hainbat tokitatik etorriak.
Sagardoaren kultura sustatzeko proposamena
‘Cider Week Astea’ ekimena Sagardo Foruma egiten ez den urteetan Sagardoaren Lurraldeak egiten duen dibulgazio-lanari jarraipena emateko sortu zen. Sagardo Forum bi urtean behin Donostian eta Astigarragan antolatzen den nazioarteko kongresua da, mundu osoko adituak eta ekoizleak biltzen dituena. Horrela, sagardoa bertako gastronomiarekin uztartzeen dituen hainbat aukera berritzaile eskaintzen zaie herritarrei.
Gaur goizean egindako prentsaurrekoan, Leire Alkorta Sagardoaren Lurraldeko gerenteak ekimenaren bilakaera nabarmendu du: «’Cider Week Astea’ hitzordu garrantzitsu bihurtu da sagardoaren kultura bertako publikoari gerturatzeko, gure tabernetako eta jatetxeetako gastronomiaren eta gertutasunaren bidez. Sagardo Forum egiten ez dugun urteetan, aste honek sektorearekiko interesa bizirik mantentzeko eta gure sagardoek askotariko proposamen gastronomikoekin uztartzean duten aldakortasun handia erakusteko aukera ematen digu», adierazi du.
«Gainera, edizioz edizio indarra eta hedadura irabazten ari den proposamenaren bilakaerak gure apustua berresten du, eta sagardoa txotx denboralditik kanpo ere dastatu daitekeela erakusten laguntzen digu, askotariko modutan», gaineratu du.Bestalde, Azahara Dominguez Mugikortasuneko, Turismoko eta Lurralde Antolaketako diputatuak sektoreak egiten duen «lan handia» nabarmendu du. Izan ere, lan horri esker, sagardoa «aisialdirako eta gozatzeko aukera izateaz gain, Gipuzkoarentzat motor ekonomiko garrantzitsua ere bada, jarduera, enplegua eta aukera berriak sortzen dituena». Ildo horretan, «zorte handia» dela adierazi du Gipuzkoan hain sektore «dinamikoa» izatea. Urte osoan lan egiten du, Gipuzkoaz gozatzeko jarduerak eta esperientziak eskaintzeko. Era berean, Cider Week Astean parte hartzera animatu ditu herritarrak, «lurraldean dugun garraio publikoaren sare zabalaz baliatuz».
Cider Week Astearen programa:
ASTIGARRAGA
- Malum Rex (azaroaren 16tik 22ra): Euskal Herriko lehen sagarbar-ak bi menu prestatu ditu (horietako bat beganoa) bertako eta nazioarteko sagardoekin uztartuta: Petritegi (Astigarraga), Oiharte (Zerain) eta Brutes (Suedia) upategietakoak.
- Ibai Lur (azaroaren 16tik 22ra): jatetxeak bere Gourmet menua eskainiko du estilo eta upategi ezberdinetako euskal sagardo sorta zabalarekin uztartuta.
- Sagardoetxea (azaroaren 20an): bertako eta nazioarteko sagardoen dastaketa gidatua egingo da Sagardoetxea museoan, Haritz Rodríguez pommellierraren eskutik.
DONOSTIA
- Apar (azaroaren 16tik 22ra): Kataluniako Mooma etxeko antzinako sagardo apardunaren dastaketa aperitiboan, eta Zapiainen Bizi-Goxo izotzezko sagardoarena postrean.
- Bertakoteka (azaroaren 16tik 22ra): bere legatz-pintxo ospetsua Euskal Sagardoa Jatorri Deitura duten hiru sagardorekin uztartuta: Zabala, Isastegi eta Zapiain.
- Bodega Klandestina (azaroaren 16tik 22ra): Cider Week Astean dastatuko diren nazioarteko sagardoen salmenta.
- Taupada (azaroaren 16tik 22ra): bere Tautalo pintxo ezaguna Bi Hotz izotzezko sagardoarekin uztartuko da.
- Iratze (azaroaren 16tik 22ra): pintxoak eta krepeak (bakarrik 19an) bertako eta Bretainiako sagardoekin uztartuta: Cidrerie du Léguer, Cidre Nicol, Zapiain, Astiazaran…
- Gagootz (azaroaren 19an): pizza-errazioak Italiako Floribunda upategiko rosé sagardoarekin lagunduta; sagardo hori mami gorriko sagarrekin egina dago.
- Sua.Muka (azaroak 21 eta 22): Zapiainen Sagarmut sagardo-bermuta aperitiboan, pintxo batekin lagunduta.
HERNANI
- Errioguarda Enea (azaroaren 16tik 22ra): jatetxeak aste osoan zehar bere dastatzeko menua eskainiko du bertako eta nazioarteko sagardoekin uztartuta: Weidmann & Groh (Alemania), Apal Sideri (Norvegia) eta Floribunda (Italia).
HONDARRIBIA
- Tatapas Gastroteka (azaroak 20): lau platereko menua, nazioarteko eta bertako sagardoekin uztartuta: Weidmann & Groh (Alemania), Apal Sideri (Norvegia), Floribunda (Italia) eta Egi-Luze (Errenteria).
- Higeralde Sagarlekua (azaroaren 16tik 22ra): bere platerak Bidasoa ibaiaren bi aldeetako sagardoekin uztartuko ditu aste osoan zehar: Bordatto (Nafarroa Beherea), Zelaia (Hernani) eta Egiazki (Lapurdi).
TOLOSA
- Tolosaldea Jatetxea (azaroaren 16tik 22ra): bertako eta nazioarteko sagardo sorta zabalaren dastaketa aste osoan zehar, eta establezimenduan bertan erosteko aukera. Besteak beste, Apal Sideri (Norvegia), Weidmann & Groh (Alemania) eta Cidre Nicol (Bretainia).
- Ama Tolosa (azaroaren 20tik 22ra): ostiraletik igandera, Michelin izarra duen jatetxe honek bertako produktuak bertako sagardo sorta batekin uztartzen dituen menua eskainiko du.
Nabarmentzekoa da parte hartzen duen establezimendu bakoitzak zuzenean kudeatuko dituela bere erreserbak, beharrezkoa izanez gero. Hala ere, ‘Cider Week Astea’ ekimenari buruzko informazio guztia esteka honetan topatu daiteke.