Gipuzkoako Foru Aldundiko Ekonomia sustapeneko, Landa inguruneko eta Lurralde Orekako Departamentuak Gipuzkoako Lurralde Historikoan sagardorako sagarrondoak landatu, hobetu eta garatzeko diru laguntzen 2016ko deialdia onartu berri du.
Diru laguntza hauen xedea da diruz laguntzea Gipuzkoako Lurralde Historikoko nekazariek eta sagardogileek bertako sagastiak landatzeko eta makineria berezia erosteko egindako inbertsioak, horrela, Gipuzkoako sagardo naturalaren egileen sektoreari bertako lehengaien hornikuntza bermatzeko helburuz. Diru laguntza hauen oinarrian dagoen araudia da Europako Batzordearen 2014ko ekainaren 25eko 702/2014 (EE) Erregelamenduaren 14. artikulua, zeinak adierazten baitu bateragarriak direla nekazaritza eta basogintza sektoreetarako eta nekazaritza eremuetarako laguntza kategoria jakin batzuk barne merkatuarekin, Europako Batasunaren Funtzionamendu Itunaren 107. eta 108. artikuluetan dioena aplikatu.
Honakoak dira diruz lagundu daitezkeen inbertsioak eta jardunketak:
1. Sagardoa egiteko bertako sagarrondo barietateak jartzeko eta landatzeko laguntzak:
— Helburua: Sagardoa egiteko sagarrondo barietate bereziak landatzeko inbertsioak eta gastu lagungarriak: zuhaitz landareak erostea, landaketa lanak egitea (lurra prestatzea, lur berdinketa txikiak beharrezkoak eta justifikatuak badira, sagastirako sarbideak, zuloak egitea, ongarritzea eta landatzea), euskarri egiturak jartzea eta landaketa babesteko sistemak jartzea (haize babes naturalak, animalien kontrako perimetroko hesiak eta landareen banakako babes mekanikoak).
— Laguntzen zenbatekoa: Inbertsio horientzako laguntzak kapitalaren bidezko diru laguntza bezala emango dira. Sagastia jartzeko hasierako inbertsioak bakarrik diruz lagunduko dira, deialdian dagoen inbertsio modulatuen taularen arabera, ondorengo mantentze kostuak kontuan hartu gabe. Diru laguntzaren kopuruak ezingo du modulazio taulan jarduera bakoitzerako agertzen den zenbatekoa gainditu.
— Diru laguntzaren xede diren sagardiak jartzeko baldintza bereziak:
a) Sagastia landatuko den lursailak norberarena, alokatua edo lagatakoa izan behar du. Jabetza zuritzeko, beharrezkoa izango da jabetzaren eskritura; alokairua zuritzeko, berriz, alokatze kontratua beharko da, alde biek sinatua 25 urterako gutxienez. Kontratu hori Eusko Jaurlaritzako Landa Errendamenduen Erregistro Ofizialean balioztatu eta erregistratuko da. Lagapena, horretarako sinatutako kontratuaren bidez zurituko da, 25 urterako gutxienez.
b) Inbertsioak baloratu eta lagunduko dira deialdian ezarritako moduluen arabera, eta 12. oinarriaren arabera zurituko dira.
c) Diruz laguntzea eskatzen den landaketa azalera guztia hektarea bat baino handiagoa izango da, betiere, sagastiari emandako azalera, inbertsioa egin ondoren, gutxienez bi hektareakoa bada. Barietateek sagardoa egiteko egokitzat jotakoak izan behar dute.
d) Lagungarriak izango dira, bakarrik, lur egoki eta mekanizagarrietan jartzen diren sagastiak. Horretarako, landaketa egin baino lehen foru aldundiko teknikari batek bisitaldi bat egingo du eta aldeko txostena eman beharko du. Sagastia landatu nahi den lursailaren aurreko erabilera basokoa izan bada, beharrezkoa da Mendiak eta Habitatak Kudeatzeko Zerbitzuak erabilera aldatzeko emandako baimena.
e) Diruz lagunduko diren landareek Gipuzkoako Foru Aldundiko Landare Alorrak aldez aurretik finkatutako kalitate estandarrak bete beharko dituzte. Landareak erosiko diren mintegiak ziurtatuko du landareak aipatutako estandarren arabera ekoizten dituela eta Gipuzkoako Landare eta Landare-gaien Ekoizleen, Merkatarien eta Inportatzaileen Erregistro Ofizialean (LEMIEO) inskribatuta egongo da.
f) Landaketa lursaila: diruz lagunduko diren landaketak patroi klonalean txertatutako barietateekin egingo dira, eta landaketa egin aurretik egin beharreko lanak, eskaerarekin batera eransten den txosten teknikoaren arabera egingo dira. Behar bezala justifikatzen badira, patroi frankoko landaketek ere laguntza jaso ahal izango dute.
g) Landaketa moduak eta markoak: txosten teknikoan adieraziko dira, aukeratutako patroi eta formazio sistemaren arabera. Hala ere, txertaketaren zonaldea ez da lurperatuko, eta gutxienez 5 zentimetrora geratuko da lurrazalaren gainetik.
h) Ezohiko inbertsioen kasuan, hala nola, lur berdinketak eta sagastien sarbideak, beharrezkoa izango da honako hauek aurkeztea: udal baimena, egiaztatzen duen txosten teknikoa eta aurrekontu zehaztua. Eranskinean jasota ez dauden inbertsioak badira, hala nola, haize babesak, drainatzeak, etab., beharrezkoak izango dira egiaztatzen duen txosten teknikoa eta aurrekontu zehaztua. Atal honetan jasotako inbertsioetarako onartutako diru laguntzak, onartutako aurrekontu osoagatik faktura aurkeztu ondoren zurituko dira bakarrik, eta aurkeztutako aurrekontuaren %30 lagunduko da.
2. Makineria berezia erosteko laguntzak.
— Helburua: Erostea nekazaritzarako makineria eta ekipo bereziak, dela zaintzarako, dela trataerarako, dela sagardotarako sagarrondoetako fruitua jasotzeko: sagar astingailuak, inaustari pneumatikoak edo elektronikoak, ongarritzeko makinak, atomizagailuak, langarreztagailuak, traktoretik esekitako sasi-garbitzeko makinak, bere indarrez dabiltzan sagar biltzaileak edo biltzaile autopropultsatuak, inausketa mekanikoak egiteko makineria.
— Laguntzen zenbatekoa: Inbertsio horientzako laguntzak kapitalaren bidezko diru laguntza bezala emango dira. Diru laguntzaren kopurua, inbertsio lagungarriaren bolumenaren portzentajea, %35 izango da (sagarrak biltzeko makinak izan ezik, horretarako %25eko laguntza emango baita).
— Makineria erosteko inbertsioetarako baldintza bereziak:
a) Erostekoa den makineriaren aurrekontu zehatza aurkeztu behar da.
b) Sagarra biltzeko makineria erosteko erosketa bideragarri egingo duen fruitu sail baten titularitatea egiaztatu beharko da: 5 ha.
c) Makineria erosteko gehienezko inbertsio lagungarria 40.000 euro da.
d) Onuradunak gutxienez 8 urtez erabili eta bere jabetzapean eduki beharko du erositako makineria hori. Epe horretan ezingo da laguntzarik eskatu diruz lagundutakoaren antzeko funtzioak dituen makineria erosteko.
e) Makineria Nekazaritzako Makineriaren Erregistro Ofizialean inskribatu behar da.
3. Laguntza osagarriak.
Laguntza osagarri izango dira, soilik, 1.2.2. atalean jasota dauden makineria erosteko inbertsioak, honako baldintza eta ehuneko hauen arabera:
— Nekazari gazteek laguntza osagarria jaso ahal izango dute ustiategia martxan jarri eta bost urteko epean egiten diren inbertsioetarako, baldin eta eskaera egiten den unean 40 urte baino gehiago ez badituzte, 2. oinarriaren 2.1 atalean zehazten diren gaitasun eta konpetentzia profesionalak badituzte eta lehen aldiz badira ustiategi bateko titular. Laguntza osagarri hori diruz lagundu daitekeen inbertsioaren balioaren %5ekoa izango da. Horretarako, batetik, eskatutako prestakuntza egiaztatu beharko dute; bestetik, arloko araudi bereziaren araberako erregistro eta ustiatze liburuak aurkeztu beharko dituzte, eta horren bidez egiaztatu, eskatzailea ustiategiko buru dela eta ustiategia kudeatzeak ekar ditzakeen arrisku eta ardurak beregain hartzen dituela.
— Ustiategiaren titularrak ustiategiko nekazaritza eta ingurumen kontratu bat izenpetuta izanez gero sagardotarako bertako barietateko sagarrondo landaketa neurrirako, diruz lagundu daitekeen inbertsioaren balioaren %5era arteko laguntza gehigarria eskuratuko du.
4. Nekazaritza ustiategiak bete beharreko baldintzak.
Ustiategia Gipuzkoako Lurralde Historikoko Nekazaritza Ustiategien Erregistroan inskribatuta egongo da.
5. Inbertsioak bete beharreko baldintzak.
— Egingo diren inbertsioak Gipuzkoako Lurralde Historikoan gauzatuko dira.
— Diruz lagunduko den gutxieneko inbertsioa helburu bakoitzeko 5.000 € izango da, makineria erosteko izan ezik. Kasu horretan 1.000 € izango da.
— Finantza errentamenduko kontratu bat dagoenean, errentatzaileak egindako aktiboen erosketa diruz lagundu ahal izango da, betiere, erosketa aukera bat jaso edo kontratuan aipatutako aktiboaren bizitza erabilgarriaren adinako errentamenduko gutxieneko epe bat ezartzen bada.
— Diru laguntzari dagokionez, diruz lagungarriak izango dira laguntza eskatu ondoren egiten diren gastuak eta inbertsioak.
Informazio gehiagorako:
https://ssl4.gipuzkoa.net/castell/bog/2016/06/28/c1604630.pdf