Dando pasos para el futuro
Descripción
Sidra / Asociación Sidreros Gipuzkoa / sidrerías / Plana HiruB
Ficha
- Fuente: Urumeako Kronika
- Fecha: 2012-01-22
- Clasificación: 2.1. Sidra
- Tipo documento: Prensa
- Fondo: Sagardoetxea fondoa »
- Código: NA-002084
Texto completo
Berrikuntza Planean murgilduta eta zuzendaritza berriarekin ekin dio urteari Gipuzkoako Sagardogileen Elkarteak. Gipuzkoako 51 sagardotegi biltzen ditu elkarteak, sektorearen % 80, eta tartean dira Hernaniko zortzi. Gipuzkoako Sagardogileen Elkarteak Gipuzkoa guztiko 51 sagardotegi biltzen ditu gaur egun, horietatik 8 Hernanikoak: Akarregi, Alberro, Elorrabi, Iparragirre, Itxas- Buru, Larre-Gain, Otsua Enea eta Rufino. Elkartea ofizialki 1977an sortu bazen ere, Gerra aurrean biltzen omen ziren Gipuzkoako sagardogileak beren interesen alde. Gipuzkoako Elkarteak azpimarratu duenez «Gipuzkoako sagardo sektorearen %80 ordezkatzen dugu sagardotegi kopuruan eta %70 egiten den sagardo litro kopuruan. Horrez gain, azpimarragarria da, Euskal Herrian egiten den sagardo sagarraren %80tik gora Gipuzkoako Sagardogileen Elkarteko sagardotegiek hartzen dugula». Hala ere, Gipuzkoako Sagardogileen Elkarteak uste du asko dagoela egiteko bertako sagarraren aldeko apustu horretan: «Elkarteko sagardotegi asko dira bi urtean behin sagardo guztia bertako sagarrarekin egiten dutenak, baina ez-urtea etortzean kanpora jo beharra izaten da. Bertako produktu baten alde egin nahi bada, sagastiak urtero emateko moduan antolatu behar dira, sagar mota egokiak bakarrik aldatu, sagar barietateka bildu ahal izateko moduan planifikatu sagastia eta abar luze bat. Lan asko dago hor egiteko eta Elkartea hori babestu eta bultzatzen ari da». Bestalde, Elkarteak garbi dauka sektoreak bi apustu garbi dituela: botila eta txotxa. «guk dakigula, munduan beste inon ematen ez den ohitura bat izateaz gain, txotx garaia oso garrantzitsua da guretzat, eta hori zaindu nahi genuke, ondo planifikatuta, sagardogileontzat ez ezik sektore askorentzat izan bailiteke garrantzitsua». Bestalde, botilako sagardoari ere indar eman nahi dio Elkarteak: «kontsumitzaileari azaldu nahi diogu zer dagoen sagardo botila baten atzean, zein ezaugarri dituen hain gurea den produktu honek, eta nola ez, etengabe hobetzen joateko bideak jartzea ere bada gure erronka». Helburua, HiruB plana garatzea Elkarteak Berrikuntza Plana egin berri du HiruB izenarekin (3 B: Berrikuntza, Beharra eta Batera). Bertan, 2012-2015 urte artean garatu ahal izateko 26 ekintza biltzen dira, horietako batzuk dagoeneko martxan badaude ere. «Elkarteak gauza asko egiten ditu, Elkartekideen alde nahiz sektorerako, baina ekintza guzti horiek ordenatu nahi izan dira, eta zer behar gehiago dauden ikusi eta proiektu berriak planifikatu, Elkartekideak eta sektorea etorkizunerako prestatzeko. Helburu horrekin prestatu dugu HiruB proiektua, datozen lau urteotan garatuko duguna» azpimarratu dute. Zenbait proiektu martxan daude dagoeneko, horietan bat kontsumitzailearentzat interesgarria izan litekeena: «internet bidez sagardoa saltzeko web orria egina dago, www.sagardo.com eta www.sidranatural.com helbideetan eta hilabete honetan bertan jarriko da indarrean». Arantxa Eguzkizak segiko du lehendakari, zuzendaritza berrian Bederatzi kide izango ditu elkarteko zuzendaritza berriak. 2011ko abenduan izan zen Elkarteko zuzendaritza berria eratzeko batzarra, datozen lau urteetarako, eta Hernaniko Iparragirre sagardotegiko Arantxa Eguzkizak jarraituko du lehendakari izaten, batzarrak aho batez onartuta. Azken lau urteotan izan duen zuzendaritza bera izango du ondoan, aldaketa bakarrarekin. Zuzendaritza honela geratu da: Ibon Aburuza (Adunako Aburuza sagardotegia); Hur Astarbe (Astigarragako Astarbe sagardotegia); Ainara Otaño (Astigarragako Petritegi sagardotegia), Gabriel Lizeaga (Astigarragako Lizeaga sagardotegia), Iñaki Bengoetxea (Irungo Ola sagardotegia) eta Pako Calonge (Donostia-Igeldoko Calonge sagardotegia). Ordezkoak berriz, Patxi Azkonobieta (Usurbilgo Urdaira sagardotegia) eta Napoleon Lertxundi (Usurbilgo Saizar sagardotegia). Zabaldu!