Nazioarteko sagardogintzaren topaleku izango da Erribera kulturgunea gaurtik
Descripción
Sagardo Foruma egingo da gaurtik larunbatera Astigarragan eta Donostian, «sagarrari, sagardoari, sagardoaren kulturari, ondareari eta turismoari buruzko nazioarteko ekitaldia».
astigarraga feria donostia jornada concurso sagardo forum sidra manzana turismo
Ficha
- Autor: Iñigo Goñi Iradi
- Fuente: Kronika
- Fecha: 20 de noviembre de 2025
- Clasificación: 5.7. Formación
- Tipo documento: Prensa
- Fondo: Sagardoetxea fondoa »
- Código: NA-017906
Texto completo
Sagardo Foruma egingo da gaurtik larunbatera Astigarragan eta Donostian, «sagarrari, sagardoari, sagardoaren kulturari, ondareari eta turismoari buruzko nazioarteko ekitaldia».
Sagardoaren Lurraldeak antolatuta, VI. Sagardo Foruma ospatuko da gaurtik larunbatera bitartean. Astigarragako Erribera kulturgunea, eta Basque Culinary Centerrek Oriamendin (Donostia) daukan egoitza, izango du elkargunea nazioarteko topaketak. Antolatzaileek aditzera eman dutenez, «sagarrari, sagardoari eta sagardoaren kulturari, ondareari eta turismoari buruzko nazioarteko ekitaldia» izango da.
Topaketaren seigarren edizio honetan, antolatzaileen asmoa izango da mundu osoko sagardoaren adituak nahiz sagardozaleak biltzea, «haien ezagutzak zein esperientziak partekatu eta sagardoaren kultura sustatzeko».
Sagardo Azoka etzi, mundu osoko 23 ekoizlerekin
Gaurkoan, batetik, hainbat herrialdetako sagardoak lehiatuko dira Basque Culinary Centerren izango den Nazioarteko Sagardo Lehiaketan, 15:00etan hasita: Portugal, Norvegia, Herbehereak, Letonia, Frantzia, Polonia, Lituania, Txekiar Errepublika eta Ameriketako Estatu Batuak, besteak beste. Epaimahai berezituak bederatzi kategoriatan sailkatutako sagardoak epaituko ditu, edari tradizional honen bikaintasuna eta aniztasuna nabarmentzen dituen lehiaketa honetan.
Larunbatean banatuko dituzte sariak, Basque Culinary Centerren bertan, 10:00etan hasiko den Nazioarteko Sagardo Azokan. Mundu osoko 23 ekoizleren postuak izango dira bertan (Norvegia, Austria, Lituania, Frantzia, Alemania, Erresuma Batua, Letonia, Italia, Txile, Ameriketako Estatu Batuak eta abar), eta gerturatzen diren bisitariek bertako, estatuko zein nazioarteko ehun sagardo inguru dastatzeko aukera izango dute. Bi urtean behingo hitzordu paregabea da zapore nahiz esperientzia berriak bilatzen dituzten sagardozale guztientzat, dastaketa gidatu bereziak ere izango baitira azokan: alkoholik gabeko sagardoena, eta sagardo-bermutena.