Euskadi, en plena campaña d'espiches, cuenta xubir esti añu un 25% el preciu de la sidra
Descripción
Los vascos ellaboraron en 2021 un total de 1,2 millones de llitros baxo la so marca de calidá, polos 2,3 millones que sumó la Dop d'Asturies
euskal sagardoa marca mercado precio sidra temporada del txotx
Ficha
- Autor: José A, Ordóñez
- Fuente: La Nueva España
- Fecha: 2023-02-15
- Clasificación: 2.1. Sidra
- Tipo documento: Prensa
- Fondo: Sagardoetxea fondoa »
- Código: NA-015700
Texto completo
La sidra vasco (sagardoa) con sellu autonómicu va xubir un 25% el so preciu a lo llargo d'esti añu, según avanzaron fontes del so conseyu regulador. La medría va asitiar el preciu de la botella de mayor calidá sobre los 4 euros, perriba de los 3,70 euros que suel costar l'asturiana acoyida a la Denominación d'Orixe Protexida (Dop).
Los llagareros vascos, que yá aplicaron incrementos de precios nos últimos años, xustifiquen el previstu pa esti 2023 na inflación y la xuba de los costos del vidriu, el cartón, la enerxía y el gasóil. «Como asocedió na mayoría de sectores, el de la sidra tamién precisa actualizar los sos precios pa facer frente a la situación actual», sorrayen los responsables de la marca de calidá Euskal Sagardoa.
PUBLICIDAD
Frente a los 2,3 millones de llitros ellaboraos sol paragües de la Dop Sidra d'Asturies en 2022, un añu marcáu pola escasez de la vecería nel que s'emplegaron 3,2 millones de mazanes de les variedaes autorizaes pol conseyu regulador, los vascos rondaron los 1,2 millones de llitros y los sos profesionales usaron unos dos millones de kilos de frutu. Con too y con ello, la diferencia a favor d'Asturies tocantes a ellaboración sigue siendo perimportante, yá que, cuntando tamién los caldos ensin denominación, de los llagares asturianos salen alredor de 40 millones de llitros cada añu.
L'anunciu de la medría del preciu de la sagardoa tuvo llugar al entamu de la tradicional temporada de sidreríes, tamién conocida como «txotx», que ye l'acción d'espichar una pipa y, tradicionalmente, el berru col que s'avisaba a los participantes por que s'averaren a beber. La mayor parte de los llagares d'Euskadi disponen tamién de serviciu de restorán, de forma que ye posible combinar el consumu de sagardoa echada directamente dende les "kupeles" con productos típicos de la gastronomía local, ente los que nun suelen faltar contundentes carnes y tortielles de bacaláu.
La temporada de «txotx» concéntrase fundamentalmente n'Hernani y Astigarraga, conceyos guipuzcoanos nos qu'abonden les sidreríes. Bona parte d'elles ufierten al veceru reserves y la posibilidá de participar en cates empobinaes de los sos caldos. P'allegar a estes espiches ensin utilizar el vehículu priváu ta en marcha un serviciu d'autobús («sagardobus») que conecta –ida y vuelta– Bilbao, Vitoria o Pamplona colos llagares arimaos a San Sebastián mesmo pa les comides como pa les cenes.