Bukatu dira Astigarragako Santioak, Santa Anako festa jendetsuarekin
Descripción
Modurik onenean agurtu zituzten Santio Jaiak atzo astigartarrek: Santa Anako ospakizunen inguruan sekulako jendetza elkartuta, eta giro paregabean. Egun haundietako itxura berreskuratu zuen Foru Plazak atzo, goizetik iluntzera; eta ikusmin haundia sortu zuten, bertan jokatu ziren probek. Eguerdiko deman, Mixiyuaren idi parea nagusitu zen, ia 52 plazako marka ederrarekin.
astigarraga degustación fiestas sagardo egunak sidra santa ana
Ficha
- Fuente: Kronika.eus
- Fecha: 2022-07-27
- Clasificación: 5.2. Días de la sidra
- Tipo documento: Prensa
- Fondo: Sagardoetxea fondoa »
- Código: NA-015058
Texto completo
Milaka lagun gerturatu ziren Foru Plazara atzo, Santa Ana eguneko ospakizunaz gozatzera. Egun ederrarekin eman zieten bukaera, aurtengo jaiei.
Modurik onenean agurtu zituzten Santio Jaiak atzo astigartarrek: Santa Anako ospakizunen inguruan sekulako jendetza elkartuta, eta giro paregabean. Egun haundietako itxura berreskuratu zuen Foru Plazak atzo, goizetik iluntzera; eta ikusmin haundia sortu zuten, bertan jokatu ziren probek. Eguerdiko deman, Mixiyuaren idi parea nagusitu zen, ia 52 plazako marka ederrarekin. Eta bigarren mailako Gipuzkoako Aizkolari Txapelketan, azkeneko kolpeetan nagusitu zitzaion Jesus Mari Mujika, Basozabaleko Jokin Urretabizkaiari. Txapela eta lehenengo mailan aritzeko aukera kendu zizkion horrela.
Festa borobildu zuten Zubietako joaldunek, Xabier eta Joxan trikitilariek, Oihana Iguaran eta Onintza Enbeita bertsolariek, Brun burdingintzako artisauek, Lierni Osa eta Hodei Iruretagoiena harrijasotzaileek, eta nola ez, 13 sagardotegitako sagardoek.
Zezensuzkoarenak izan ziren, Santiotako suaren azkeneko txinpartak; baina ez ziren itzali, Laiotzek denak dantzan jarri zituen arte.
Santiotako argazki guztiak ikusgai, 'kronika.eus'en
Festak bukatuta, bizitakoak oroitzeko ordua iritsi da, eta lan hori errazteko aukera dute, kronika.eus webgunea bisitatzen dutenek. Egun guztietako argazkiak daude ikusgai, bertan.