Sagardo denboraldia aurkeztu dute Astigarragan; ekoizpen eskasarekin eta pitxerrean ezinbestean
Descripción
Sagardoaren Lurraldea erakundeak asteazken honetan aurkeztu du sagardo denboraldi berria Astigarragan, Ander González sukaldaria eta 'A bocados' ETB2ko saioaren aurkezlea gonbidatuta. Ekitaldian tokiko eta EAEko agintariek parte hartu dute, hala nola Xabier Urdangarin Astigarragako alkate eta Sagardun Partzuergoko lehendakariak, Turismoko EAEko sailburuak, Javier Hurtadok, eta Xabier Arruti Gipuzkoako Foru Aldundiko Nekazaritza eta Landa Garapeneko zuzendariak.
ander gonzalez astigarraga coronavirus protagonista sagardo berriaren eguna sidra apertura del txotx cosecha
Ficha
- Fuente: naiz:
- Fecha: 2021-03-24
- Clasificación: 5.1. Aperturas txotx
- Tipo documento: Prensa
- Fondo: Sagardoetxea fondoa
- Código: NA-013409
Texto completo
Sagardoaren Lurraldea erakundeak asteazken honetan aurkeztu du sagardo denboraldi berria Astigarragan, Ander González sukaldaria eta ‘A bocados’ ETB2ko saioaren aurkezlea gonbidatuta.
Ekitaldian tokiko eta EAEko agintariek parte hartu dute, hala nola Xabier Urdangarin Astigarragako alkate eta Sagardun Partzuergoko lehendakariak, Turismoko EAEko sailburuak, Javier Hurtadok, eta Xabier Arruti Gipuzkoako Foru Aldundiko Nekazaritza eta Landa Garapeneko zuzendariak.
2020ko uztak 8 milioi litro sagardo eman ditu, eta horietatik 2 milioi inguru bertako sagarrarekin. Euskal Sagardoa Jatorrizko Deiturak 1,2 milioi litro ekoitzi ditu, 48 sagardotegik prestatuak; Gipuzkoako 42k, Bizkaiko 4k eta Arabako 2k.
Uzta txikiagoa izan den arren, aurtengo sagardoak «izaera eta gorputz handia» du, Sagardoaren Lurraldeak jakinarazpen batean adierazi duenez. Sagardoa hori kolorekoa da, fruta ukituak ditu, «txinparta fina du eta ahoan biribila da» eta «konplexutasun handiko sagardoa da, bilakaera ahalmen handikoa».
Uzta txikia eta pitxerrean
Sagar ekoizpena aurreko urtekoa baino askoz txikiagoa izan da, udako lehortearen, eguzki-kolpeen eta karpocapsak edo sagar-harrak eragindako kalteen ondorioz, eta, gainera, sail askotan fruituen tamaina beste kanpaina batzuetan baino txikiagoa izan da.
Jatorrizko Deituraren babespeko sagar ekoizpenerako 2 milioi kilo inguru erabili dira, 480 hektareatik eta EAEko 248 sagar ekoizletik.
Urdangarinek azaldu duenez, «pandemiak markatutako sagardotegien ohiz kanpoko» denboraldi honetan «atzera begiratu eta ohitura batzuk berreskuratzea» erabaki da. Hala, Donostiatik Astigarragara tranbian joaten ziren herritarrek egiten zuten bezala, sagardo berria edalontzi eta pitxerretan hartuko da.
Pitxerrean zerbitzatuko da, beraz, aurtengo sagardoa, covid-19a ez zabaltzeko mahaikide guztiak eserita egon daitezen.
Bestalde, Turismo sailburuak uste du, pandemia dela eta, une egokia dela «bisitariek esperientzia gastronomiko eta kulturalez gozatzeko». «Jarduera horrek, gainera, tokiko garapenari laguntzen dio, onura ekonomikoak ingururik hurbilenera, lurraldera eta hura hartzen duten eskualdeetara itzultzen baitira», nabarmendu du.
Xabier Arrutik esan du sagardogileen beharrak entzun ostean, bertako sagarrarekin egindako sagardoa lortzeko diru laguntzak bideratu dituztela, sagarrondoak ugarituz.